aasman TuT paDa hai chhat par

āsmāñ TuuT paḌā hai chhat par

mutma.in huuñ ki ḳhudā hai chhat par

ye Tapakne kī nahīñ hai pyāre

kasrat-e-zar kī duā hai chhat par

mujh meñ ab tak hai yahī ḳhauf basā

chīḳh meñ Duubī sadā hai chhat par

ek muflis ne kahā bārish se

dekh merā bhī ḳhudā hai chhat par

vaqt nīche bhī utāregā use

umr bhar kaun rahegā chhat par

mahv-e-hairat hai har ik bīnā.ī

koī to khel bapā hai chhat par

raah meñ aa.e to lagtā hai bhalā

dekhne meñ jo burā hai chhat par

chāñd utrā hai mire pahlū meñ

nuur meñ Duubī fazā hai chhat par

jab se raste pe lagī haiñ nazreñ

rāsta bantā gayā hai chhat par

habs kamre kā batāne aayā

mohtaram aaj huā hai chhat par

shauq se dekh rahī hai duniyā

husn-e-tasvīr banā hai chhat kar

ye bhī ruḳhsat kā ajab lamha hai

shahr kā shahr khaḌā hai chhat par

vaqt raste se uThā laayā hai

dekh 'shāhid' bhī gayā hai chhat par

aasman TuT paDa hai chhat par

mutmain hun ki KHuda hai chhat par

ye Tapakne ki nahin hai pyare

kasrat-e-zar ki dua hai chhat par

mujh mein ab tak hai yahi KHauf basa

chiKH mein Dubi sada hai chhat par

ek muflis ne kaha barish se

dekh mera bhi KHuda hai chhat par

waqt niche bhi utarega use

umr bhar kaun rahega chhat par

mahw-e-hairat hai har ek binai

koi to khel bapa hai chhat par

rah mein aae to lagta hai bhala

dekhne mein jo bura hai chhat par

chand utra hai mere pahlu mein

nur mein Dubi faza hai chhat par

jab se raste pe lagi hain nazren

rasta banta gaya hai chhat par

habs kamre ka batane aaya

mohtaram aaj hua hai chhat par

shauq se dekh rahi hai duniya

husn-e-taswir bana hai chhat kar

ye bhi ruKHsat ka ajab lamha hai

shahr ka shahr khaDa hai chhat par

waqt raste se uTha laya hai

dekh 'shahid' bhi gaya hai chhat par