آسمانوں پہ عجب عالم پسپائی تھا

آسمانوں پہ عجب عالم پسپائی تھا

اس تماشے کا مگر میں ہی تماشائی تھا

اب بھی ازبر ہے مجھے تربیت مکتب دل

درس وحشت کے لیے جامۂ رسوائی تھا

وصل کا راگ بھی کھو بیٹھا نظام آہنگ

نغمۂ ہجر مرا کس کا تمنائی تھا

اپنی آواز کے جنگل میں بسر کرتا ہوں

میرے اطراف کبھی خطۂ تنہائی تھا

ایک وہ در جسے لاحق تھا تغافل کا مرض

ایک میں تھا مجھے آشوب جبیں سائی تھا

نسخۂ شوق کہیں خاک بہ سر تھا ثاقبؔ

اور درپیش مجھے کار مسیحائی تھا