آسمانوں سے زمینوں کو ملانے والے

آسمانوں سے زمینوں کو ملانے والے

جھوٹے ہوتے ہیں یہ تقدیر بتانے والے

اب تو مر جاتا ہے رشتہ ہی برے وقتوں پر

پہلے مر جاتے تھے رشتوں کو نبھانے والے

جو ترے عیب بتاتا ہے اسے مت کھونا

اب کہاں ملتے ہیں آئینہ دکھانے والے

بن گیا زہر مری لو کا دھواں رات گئے

صبح اٹھے ہی نہیں مجھ کو بجھانے والے

تجھ میں ہمت ہے تو سورج کے مقابل بھی آ

میرے معصوم چراغوں کو ڈرانے والے

اب گیا ہے تو پلٹ کر مجھے آواز نہ دے

لوٹ کے مت آ مجھے چھوڑ کے جانے والے

پردے دروازوں پہ آنگن میں حسیں چہرے تھے

گاؤں میں گھر ہوا کرتے تھے خزانے والے