aasra harf-e-dua gham se mafar hone tak

aasrā harf-e-duā ġham se mafar hone tak

sabr bhī chāhiye ab us meñ asar hone tak

gar baqā kī hai tamannā to fanā kar ḳhud ko

biij sahtā hai sitam kitne shajar hone tak

rab kī taḳhlīq pe añgusht-ba-dandāñ haiñ malak

marhale dekh le miTTī se bashar hone tak

baḳhiya-gar chāk-e-garebāñ kī ho tadbīr koī

huuñ tirī dast-nigar apnā hunar hone tak

ishq meñ bar-sar-e-paikār ḳhirad aur junūñ

marg be-maut hai ab ma.arka sar hone tak

vo tirī yaad ke aañsū the jo bahne na diye

chashm vīrāñ meñ ruke shahr-badar hone tak

maiñ bhī ban jā.ūñ shab-e-ġham koī nanhā bachcha

jo ki kho jaatā hai ḳhvāboñ meñ sahar hone tak

the jigar qalb-o-nazar zād-e-safar jab 'shāzī'

ḳhauf-e-tanhā.ī thā kyuuñ izn-e-safar hone tak

aasra harf-e-dua gham se mafar hone tak

sabr bhi chahiye ab us mein asar hone tak

gar baqa ki hai tamanna to fana kar KHud ko

bij sahta hai sitam kitne shajar hone tak

rab ki taKHliq pe angusht-ba-dandan hain malak

marhale dekh le miTTi se bashar hone tak

baKHiya-gar chaak-e-gareban ki ho tadbir koi

hun teri dast-nigar apna hunar hone tak

ishq mein bar-sar-e-paikar KHirad aur junun

marg be-maut hai ab marka sar hone tak

wo teri yaad ke aansu the jo bahne na diye

chashm viran mein ruke shahr-badar hone tak

main bhi ban jaun shab-e-gham koi nanha bachcha

jo ki kho jata hai KHwabon mein sahar hone tak

the jigar qalb-o-nazar zad-e-safar jab 'shazi'

KHauf-e-tanhai tha kyun izn-e-safar hone tak