aastane lahu mein tar dekhe

āstāne lahū meñ tar dekhe

ibn-e-mariyam salīb par dekhe

ye karishma hai dair-o-ka.aba kā

jalte ātish baġhair ghar dekhe

dekhī taqdīs nāchte uryāñ

hañste us par haram ke dar dekhe

sham.a roī na hashr-e-mahfil par

luTte jazbāt tā-sahar dekhe

phuul masle ga.e aqīdat ke

jalve mahmil ke dar-ba-dar dekhe

chashm-e-ibrat meñ paḌ ga.e kāñTe

dekhne vaale be-basar dekhe

paañv uThte nahīñ musāfir ke

saañp kī tarah rahguzar dekhe

ham ko nisbat na ho sikandar se

ham bhaTakte raheñ ḳhizar dekhe

'baḳht' Duubā kuchh is tarah sāhil

chashm-e-barbād se bhañvar dekhe

aastane lahu mein tar dekhe

ibn-e-mariyam salib par dekhe

ye karishma hai dair-o-kaba ka

jalte aatish baghair ghar dekhe

dekhi taqdis nachte uryan

hanste us par haram ke dar dekhe

shama roi na hashr-e-mahfil par

luTte jazbaat ta-sahar dekhe

phul masle gae aqidat ke

jalwe mahmil ke dar-ba-dar dekhe

chashm-e-ibrat mein paD gae kanTe

dekhne wale be-basar dekhe

panw uThte nahin musafir ke

sanp ki tarah rahguzar dekhe

hum ko nisbat na ho sikandar se

hum bhaTakte rahen KHizar dekhe

'baKHt' Duba kuchh is tarah sahil

chashm-e-barbaad se bhanwar dekhe