aata hun jab us gali se sau sau KHwari khinch kar

aatā huuñ jab us galī se sau sau ḳhvārī khīñch kar

phir vahīñ le jaa.e mujh ko be-qarārī khīñch kar

pahuñchā hai ab to nihāyat ko hamārā hāl-e-zār

lā use jis-tis tarah tāsīr-e-zārī khīñch kar

koh-e-ġham rakhtī hai dil par is ḳhirām-e-nāz se

ḳhajlat-e-raftār-e-kabk-e-kohsārī khīñch kar

kis ke shor-e-ishq se yuuñ rotā rahtā hai sadā

naala o fariyād ye abr-e-bahārī khīñch kar

bāñdhūñ huuñ vārastagī kā dil meñ apne jab ḳhayāl

bāñdh le jaa.eñ hameñ zulfeñ tumhārī khīñch kar

kal jo tū ghar se na niklā uTh gayā kar ke duā

sub.h se tā-shām maiñ kyā intizārī khīñch kar

gāliyāñ de maar le yā qatl kar muḳhtār hai

laa.ī ab to yaañ mujhe be-iḳhtiyārī khīñch kar

sāqiyā paiham pilā de mujh ko mālā-māl jaam

aayā huuñ yaañ maiñ azāb-e-hoshyārī khīñch kar

'hasrat' us kī bazm ke jaane se rakh mujh ko muaaf

muft meñ ro.egā vaañ se sharmsārī khīñch kar

aata hun jab us gali se sau sau KHwari khinch kar

phir wahin le jae mujh ko be-qarari khinch kar

pahuncha hai ab to nihayat ko hamara haal-e-zar

la use jis-tis tarah tasir-e-zari khinch kar

koh-e-gham rakhti hai dil par is KHiram-e-naz se

KHajlat-e-raftar-e-kabk-e-kohsari khinch kar

kis ke shor-e-ishq se yun rota rahta hai sada

nala o fariyaad ye abr-e-bahaari khinch kar

bandhun hun warastagi ka dil mein apne jab KHayal

bandh le jaen hamein zulfen tumhaari khinch kar

kal jo tu ghar se na nikla uTh gaya kar ke dua

subh se ta-sham main kya intizari khinch kar

galiyan de mar le ya qatl kar muKHtar hai

lai ab to yan mujhe be-iKHtiyari khinch kar

saqiya paiham pila de mujh ko mala-mal jam

aaya hun yan main azab-e-hoshyari khinch kar

'hasrat' us ki bazm ke jaane se rakh mujh ko muaf

muft mein roega wan se sharmsari khinch kar