aatash-bajaan hain shiddat-e-soz-e-nihan se hum

ātash-bajāñ haiñ shiddat-e-soz-e-nihāñ se ham

is par bhī kaam leñge na āh-o-fuġhāñ se ham

dil par jo ban ga.ī hai kaheñ kyā zabāñ se ham

gir kar tirī nazar se gire āsmāñ se ham

anjām-e-justujū pe vahī aa gayā maqām

āġhāz-e-justujū meñ chale the jahāñ se ham

dair-o-haram ko chhoḌ kar aa.e the ham yahāñ

jaa.eñ kahāñ ab uTh ke tire āstāñ se ham

maanā ki terā ġham hai ġham-e-rāhat-āfrīñ

laa.eñ adā-shanās-alam dil kahāñ se ham

kis ko ḳhabar thī ishq meñ kis ko ḳhayāl thā

kaT jā.eñge ta.alluq-e-kaun-o-makāñ se ham

ehsās-e-rañg-o-bū pe bahāroñ kā hai samāñ

mānūs haiñ shaguftagī-e-gul-ruḳhāñ se ham

āzār-e-ġham vafūr-e-alam soz-e-nā-tamām

ḳhush-baḳht-o-faiz-yāb haiñ umr-e-ravāñ se ham

aisā ghire haiñ jāda-o-manzil ke pher meñ

kho.e ga.e haiñ apne hī nām-o-nishāñ se ham

kaisī talāsh kis kī tamannā kahāñ kā shauq

uljhe hue haiñ lazzat-e-dard-e-nihāñ se ham

ag gumrahī jo raah dikhā.e to kuchh bane

manzil par aa ke duur hue kārvāñ se ham

ho jaa.eñ un pe miT ke subuk-dosh ai 'rishī'

tañg aa chuke haiñ ziist ke bār-e-garāñ se ham

aatash-bajaan hain shiddat-e-soz-e-nihan se hum

is par bhi kaam lenge na aah-o-fughan se hum

dil par jo ban gai hai kahen kya zaban se hum

gir kar teri nazar se gire aasman se hum

anjam-e-justuju pe wahi aa gaya maqam

aaghaz-e-justuju mein chale the jahan se hum

dair-o-haram ko chhoD kar aae the hum yahan

jaen kahan ab uTh ke tere aastan se hum

mana ki tera gham hai gham-e-rahat-afrin

laen ada-shanas-alam dil kahan se hum

kis ko KHabar thi ishq mein kis ko KHayal tha

kaT jaenge talluq-e-kaun-o-makan se hum

ehsas-e-rang-o-bu pe bahaaron ka hai saman

manus hain shaguftagi-e-gul-ruKHan se hum

aazar-e-gham wafur-e-alam soz-e-na-tamam

KHush-baKHt-o-faiz-yab hain umr-e-rawan se hum

aisa ghire hain jada-o-manzil ke pher mein

khoe gae hain apne hi nam-o-nishan se hum

kaisi talash kis ki tamanna kahan ka shauq

uljhe hue hain lazzat-e-dard-e-nihan se hum

ag gumrahi jo rah dikhae to kuchh bane

manzil par aa ke dur hue karwan se hum

ho jaen un pe miT ke subuk-dosh ai 'rishi'

tang aa chuke hain zist ke bar-e-garan se hum