aatash o injimad hai mujh mein

ātash o injimād hai mujh meñ

kaisā kaisā tazād hai mujh meñ

ḳhvāb se pahle kuchh nahīñ yaksar

jo bhī hai us ke baad hai mujh meñ

zaḳhm khulte haiñ saañs ghuTtī hai

aisī bast-o-kushād hai mujh meñ

rañj-e-dil hai harā bharā ab tak

koī to hai jo shaad hai mujh meñ

dushmanī kā hī rah gayā sarokār

varna kis kā mafād hai mujh meñ

koī is kā sabab nahīñ tū hī

ye jo itnā fasād hai mujh meñ

koī jalsa hai zor kā jaise

jis kā ye in.iqād hai mujh meñ

jise ab tak talāsh kartā huuñ

gum-shuda ek yaad hai mujh meñ

āñdhiyāñ sī jo chal rahī haiñ 'zafar'

sūrat-e-ḳhāk-o-bād hai mujh meñ

aatash o injimad hai mujh mein

kaisa kaisa tazad hai mujh mein

KHwab se pahle kuchh nahin yaksar

jo bhi hai us ke baad hai mujh mein

zaKHm khulte hain sans ghuTti hai

aisi bast-o-kushad hai mujh mein

ranj-e-dil hai hara bhara ab tak

koi to hai jo shad hai mujh mein

dushmani ka hi rah gaya sarokar

warna kis ka mafad hai mujh mein

koi is ka sabab nahin tu hi

ye jo itna fasad hai mujh mein

koi jalsa hai zor ka jaise

jis ka ye iniqad hai mujh mein

jise ab tak talash karta hun

gum-shuda ek yaad hai mujh mein

aandhiyan si jo chal rahi hain 'zafar'

surat-e-KHak-o-baad hai mujh mein