aate aate tarf mere muD ke phir kidhar chale

aate aate tarf mere muḌ ke phir kīdhar chale

jān-sāhab! bin tumhāre khā ke ġham ham mar chale

sajde de nāghisniyāñ karte haiñ tum sunte nahīñ

jo na karnī thī samājat vo bhī kar aksar chale

aadmī se but kahā.e ab ḳhudā.ī kā hai azm

Tuk karo insāf apnī had se tum bāhar chale

dekh leveñge guzāre ke ta.iiñ ab aur jā

dekhā bhārī pathar us ko chuum sar se dhar chale

āshiqoñ ne naam terā le kiyā qālib tahī

marte marte bhī to terā hī ye sab dam bhar chale

bazm meñ tum khul rahe the baiThe dekh ham ko ruk ga.e

gar yuuñ hī raazī ho lo jī uTh ham apne ghar chale

kis ke aa.e kis se rañg-raliyāñ kiyā pyaar aur chaah

ishq kī badnāmī pyāre rakh ke mujh uupar chale

ḳhizr ko shābāsh uktāyā na ab tak aur ham

zindagānī ek dam bhar kī bhī kar dūbhar chale

āh-o-afġhāñ to hamārā kar rahā hai zor-shor

juuñ bagūlā yā ho āñdhī yā koī sarsar chale

dekheñ kis kī aah kā us par asar ho 'azfarī'

ham to bhar maqdūr, kar kitnā hī shor-o-shar chale

aate aate tarf mere muD ke phir kidhar chale

jaan-sahab! bin tumhaare kha ke gham hum mar chale

sajde de naghisniyan karte hain tum sunte nahin

jo na karni thi samajat wo bhi kar aksar chale

aadmi se but kahae ab KHudai ka hai azm

Tuk karo insaf apni had se tum bahar chale

dekh lewenge guzare ke tain ab aur ja

dekha bhaari pathar us ko chum sar se dhar chale

aashiqon ne nam tera le kiya qalib tahi

marte marte bhi to tera hi ye sab dam bhar chale

bazm mein tum khul rahe the baiThe dekh hum ko ruk gae

gar yun hi raazi ho lo ji uTh hum apne ghar chale

kis ke aae kis se rang-raliyan kiya pyar aur chah

ishq ki badnami pyare rakh ke mujh upar chale

KHizr ko shabash uktaya na ab tak aur hum

zindagani ek dam bhar ki bhi kar dubhar chale

aah-o-afghan to hamara kar raha hai zor-shor

jun bagula ya ho aandhi ya koi sarsar chale

dekhen kis ki aah ka us par asar ho 'azfari'

hum to bhar maqdur, kar kitna hi shor-o-shar chale