aate hi tu ne ghar ke phir jaane ki sunai

aate hī tū ne ghar ke phir jaane kī sunā.ī

rah jā.ūñ sun na kyūñkar ye to burī sunā.ī

majnūñ o kohkan ke sunte the yaar qisse

jab tak kahānī ham ne apnī na thī sunā.ī

shikva kiyā jo ham ne gaalī kā aaj us se

shikve ke saath us ne ik aur bhī sunā.ī

kuchh kah rahā hai nāseh kyā jaane kyā kahegā

detā nahīñ mujhe to ai be-ḳhudī sunā.ī

kahne na paa.e us se saarī haqīqat ik din

aadhī kabhī sunā.ī aadhī kabhī sunā.ī

sūrat dikhā.e apnī dekheñ vo kis tarah se

āvāz bhī na ham ko jis ne kabhī sunā.ī

qīmat meñ jins-e-dil kī māñgā jo 'zauq' bosa

kyā kyā na us ne ham ko khoTī-kharī sunā.ī

aate hi tu ne ghar ke phir jaane ki sunai

rah jaun sun na kyunkar ye to buri sunai

majnun o kohkan ke sunte the yar qisse

jab tak kahani hum ne apni na thi sunai

shikwa kiya jo hum ne gali ka aaj us se

shikwe ke sath us ne ek aur bhi sunai

kuchh kah raha hai naseh kya jaane kya kahega

deta nahin mujhe to ai be-KHudi sunai

kahne na pae us se sari haqiqat ek din

aadhi kabhi sunai aadhi kabhi sunai

surat dikhae apni dekhen wo kis tarah se

aawaz bhi na hum ko jis ne kabhi sunai

qimat mein jins-e-dil ki manga jo 'zauq' bosa

kya kya na us ne hum ko khoTi-khari sunai