آتے ہی یہاں چوٹ نئی کھائی ہے اکثر

آتے ہی یہاں چوٹ نئی کھائی ہے اکثر

محفل میں تری میں نے سزا پائی ہے اکثر

الجھا ہوں تو اے دوست الجھتا ہی گیا ہوں

گتھی غم دوراں کی بھی سلجھائی ہے اکثر

جذبات کا طوفان مرے دل میں اٹھا ہے

وہ سانس جو دھڑکن کے قریں آئی ہے اکثر

آیا نہ یقیں اس کو کسی بات پہ میری

سمجھانے کی جو بات تھی سمجھائی ہے اکثر

کانٹا ہمیں سمجھا کیے گو اہل گلستاں

ہم نے بھی بہاروں میں جگہ پائی ہے اکثر

دیکھا ہے جب اس چاند کو زلفوں کی گھٹا میں

سینے میں مرے برق سی لہرائی ہے اکثر

ناداں ہیں محبت میں جو دیوانے کو سمجھائیں

جو بات مرے دل نے بھی سمجھائی ہے اکثر

تاکید تمہاری ہے کوئی تم کو نہ چھیڑے

ہم نے بھی کملؔ بات یہ دہرائی ہے اکثر