aate hi yahan choT nai khai hai aksar

aate hī yahāñ choT na.ī khaa.ī hai aksar

mahfil meñ tirī maiñ ne sazā paa.ī hai aksar

uljhā huuñ to ai dost ulajhtā hī gayā huuñ

gutthī ġham-e-daurāñ kī bhī suljhā.ī hai aksar

jazbāt kā tūfān mire dil meñ uThā hai

vo saañs jo dhaḌkan ke qarīñ aa.ī hai aksar

aaya na yaqīñ us ko kisī baat pe merī

samjhāne kī jo baat thī samjhā.ī hai aksar

kāñTā hameñ samjhā kiye go ahl-e-gulistāñ

ham ne bhī bahāroñ meñ jagah paa.ī hai aksar

dekhā hai jab is chāñd ko zulfoñ kī ghaTā meñ

siine meñ mire barq sī lahrā.ī hai aksar

nādāñ haiñ mohabbat meñ jo dīvāne ko samjhā.eñ

jo baat mire dil ne bhī samjhā.ī hai aksar

tākīd tumhārī hai koī tum ko na chheḌe

ham ne bhī 'kamal' baat ye dohrā.ī hai aksar

aate hi yahan choT nai khai hai aksar

mahfil mein teri main ne saza pai hai aksar

uljha hun to ai dost ulajhta hi gaya hun

gutthi gham-e-dauran ki bhi suljhai hai aksar

jazbaat ka tufan mere dil mein uTha hai

wo sans jo dhaDkan ke qarin aai hai aksar

aaya na yaqin us ko kisi baat pe meri

samjhane ki jo baat thi samjhai hai aksar

kanTa hamein samjha kiye go ahl-e-gulistan

hum ne bhi bahaaron mein jagah pai hai aksar

dekha hai jab is chand ko zulfon ki ghaTa mein

sine mein mere barq si lahrai hai aksar

nadan hain mohabbat mein jo diwane ko samjhaen

jo baat mere dil ne bhi samjhai hai aksar

takid tumhaari hai koi tum ko na chheDe

hum ne bhi 'kamal' baat ye dohrai hai aksar