aati thi pahle dil se kabhi bu kabab ki

aatī thī pahle dil se kabhī bū kabāb kī

raushan hai ab to siine meñ bhaTTī sharāb kī

itnā itaab surḳh hai rañgat naqāb kī

tār-e-naqāb haiñ ki nigāheñ itaab kī

dekhe koī jhalak na ruḳh-e-lā-javāb kī

sattar hazār pardoñ meñ Thahrī hijāb kī

kyuuñ hashr meñ ho fikr azāb-o-savāb kī

sohbat hai ye bhī ek sharāb-o-kabāb kī

kahte haiñ va.ada raat ko hogā vafā zarūr

allāh jald shaam ho roz-e-hisāb kī

bijlī vo chiiz hī nahīñ jis se hasīñ Dareñ

kuchh dard kī chamak hai jhalak iztirāb kī

vo shām-o-sub.h sadqe ho jin par bahār-e-gul

chun chun ke saath laa.e haiñ rāteñ shabāb kī

jannat ke ḳhvāb dekh ke aatī haiñ ham ko yaad

rindāna sohbateñ vo kabāb-o-shabāb kī

ā.īna dekhte haiñ mujhe dekh dekh kar

ye daad mil rahī hai mire intiḳhāb kī

le apne sar vabāl na auroñ kā hashr meñ

bār-e-gunah uThā.e na mīzāñ hisāb kī

ai taur soz-e-barq samajhte haiñ ham tujhe

tujh meñ to shoḳhiyāñ haiñ kisī ke hijāb kī

da.ave hai hamsarī kā sar-e-kaj-kulāh se

ai dast-e-mauj utaar le Topī habāb kī

bijlī girā.eñ tuur par āvāz hī se vo

Thahre kabhī to ham se savāl-o-javāb kī

phir bhī to kuchh sabāt ko us ke zarar nahīñ

ulTī ravāñ hai bahr meñ kashtī habāb kī

mai se kahīñ sivā hai pas-e-tauba mai-kasho

aa jaa.e duur hī se kahīñ bū sharāb kī

so hashr nazr-e-gosha-e-dāmāñ haiñ har-nafas

ai shauq-e-dīd had hī nahīñ iztirāb kī

talḳhī kā naza.a kī to kuchh ehsās ho sake

itnī to mere muñh meñ ho talḳhī sharāb kī

tum kyā ho ham ne qulqul-e-mīnā se vā.izo

bāteñ bahut sunī haiñ azāb-o-savāb kī

daur-e-mai-e-kuhan kā asar hai ye ai 'riyāz'

hai aaj bhī javān tabī.at janāb kī

aati thi pahle dil se kabhi bu kabab ki

raushan hai ab to sine mein bhaTTi sharab ki

itna itab surKH hai rangat naqab ki

tar-e-naqab hain ki nigahen itab ki

dekhe koi jhalak na ruKH-e-la-jawab ki

sattar hazar pardon mein Thahri hijab ki

kyun hashr mein ho fikr azab-o-sawab ki

sohbat hai ye bhi ek sharab-o-kabab ki

kahte hain wada raat ko hoga wafa zarur

allah jald sham ho roz-e-hisab ki

bijli wo chiz hi nahin jis se hasin Daren

kuchh dard ki chamak hai jhalak iztirab ki

wo sham-o-subh sadqe ho jin par bahaar-e-gul

chun chun ke sath lae hain raaten shabab ki

jannat ke KHwab dekh ke aati hain hum ko yaad

rindana sohbaten wo kabab-o-shabab ki

aaina dekhte hain mujhe dekh dekh kar

ye dad mil rahi hai mere intiKHab ki

le apne sar wabaal na auron ka hashr mein

bar-e-gunah uThae na mizan hisab ki

ai taur soz-e-barq samajhte hain hum tujhe

tujh mein to shoKHiyan hain kisi ke hijab ki

dawe hai hamsari ka sar-e-kaj-kulah se

ai dast-e-mauj utar le Topi habab ki

bijli giraen tur par aawaz hi se wo

Thahre kabhi to hum se sawal-o-jawab ki

phir bhi to kuchh sabaat ko us ke zarar nahin

ulTi rawan hai bahr mein kashti habab ki

mai se kahin siwa hai pas-e-tauba mai-kasho

aa jae dur hi se kahin bu sharab ki

so hashr nazr-e-gosha-e-daman hain har-nafas

ai shauq-e-did had hi nahin iztirab ki

talKHi ka naza ki to kuchh ehsas ho sake

itni to mere munh mein ho talKHi sharab ki

tum kya ho hum ne qulqul-e-mina se waizo

baaten bahut suni hain azab-o-sawab ki

daur-e-mai-e-kuhan ka asar hai ye ai 'riyaz'

hai aaj bhi jawan tabiat janab ki