aatish-e-dam-ha-e-wahshat se gareban jal gaya

ātish-e-dam-hā-e-vahshat se garebāñ jal gayā

vā.e-qismat dard-e-dil kā jo thā darmāñ jal gayā

mujh se mahbūbī firāq-e-yār kī mat pochhiye

garmī-e-vasl-e-sanam se dil kā armāñ jal gayā

bād-e-fasl-e-gul ne un ke ruḳh se ulTā dī naqāb

ḳhud kī surḳhī se charāġh andar charāġhāñ jal gayā

kar diyā apnī 'atā se rab ne ham ko āb-āb

itnā ro.e jaise koī dāġh-e-hirmāñ jal gayā

ḳhanda-e-gul kā na thā yaarā ‘anādil ko magar

ranjj-e-qurbat dekh kar saarā gulistāñ jal gayā

dil meñ hī achchhī thī garmī hasrat-e-nākām kī

ashk meñ utre 'alī' to mulk-e-mizhgāñ jal gayā

aatish-e-dam-ha-e-wahshat se gareban jal gaya

wae-qismat dard-e-dil ka jo tha darman jal gaya

mujh se mahbubi firaq-e-yar ki mat pochhiye

garmi-e-wasl-e-sanam se dil ka arman jal gaya

baad-e-fasl-e-gul ne un ke ruKH se ulTa di naqab

KHud ki surKHi se charagh andar charaghan jal gaya

kar diya apni 'ata se rab ne hum ko aab-ab

itna roe jaise koi dagh-e-hirman jal gaya

KHanda-e-gul ka na tha yara ‘anadil ko magar

ranjj-e-qurbat dekh kar sara gulistan jal gaya

dil mein hi achchhi thi garmi hasrat-e-nakaam ki

ashk mein utre 'ali' to mulk-e-mizhgan jal gaya