aatish-e-gham mein bas ki jalte hain

ātish-e-ġham meñ bas ki jalte haiñ

sham' saañ ustuḳhvāñ pighalte haiñ

vahī dasht aur vahī garebāñ chaak

jab talak haath paañv chalte haiñ

dekh terī safā-e-sūrat ko

aa.ine muñh se ḳhaak malte haiñ

joshish-e-ashk hai vo āñkhoñ meñ

jaise us se kueñ ubalte haiñ

dekh aariz ko tere gulshan meñ

saikḌoñ rang gul badalte haiñ

shoḳh-chashmī butāñ kī mujh se na pūchh

ki ye nazroñ meñ dil ko chhalte haiñ

dekhiyo shaiḳh jī kī chaal ko Tuk

ab koī dam meñ ye phisalte haiñ

bin liye kaam dil kā us kū se

'mus.hafī' ham koī nikalte haiñ

aatish-e-gham mein bas ki jalte hain

sham' san ustuKHwan pighalte hain

wahi dasht aur wahi gareban chaak

jab talak hath panw chalte hain

dekh teri safa-e-surat ko

aaine munh se KHak malte hain

joshish-e-ashk hai wo aankhon mein

jaise us se kuen ubalte hain

dekh aariz ko tere gulshan mein

saikDon rang gul badalte hain

shoKH-chashmi butan ki mujh se na puchh

ki ye nazron mein dil ko chhalte hain

dekhiyo shaiKH ji ki chaal ko Tuk

ab koi dam mein ye phisalte hain

bin liye kaam dil ka us ku se

'mushafi' hum koi nikalte hain