aatish-e-hijr ko ashkon se bujhane wale

ātish-e-hijr ko ashkoñ se bujhāne vaale

tujh ko rone bhī na deñge ye zamāne vaale

zahr-e-ġham khā to sahī ai dil-e-mahrūm-e-karam

pursish-e-hāl ko aa jā.eñge aane vaale

yaad aate haiñ to aa.e hī chale jaate haiñ

dil se jaate haiñ kahāñ dil se bhulāne vaale

dāva-e-dīd abas jur.at-e-dīdār ġhalat

aap meñ aa na sake aap ko paane vaale

jab se dekhā hai tujhe maiñ ne ye maiñ dekhtā huuñ

mujh ko dīvāna samajhte haiñ zamāne vaale

dil meñ bhī baste haiñ armān-o-tamanna kī tarah

nuur ban kar merī nazroñ meñ samāne vaale

vo zarā mast nigāhoñ se pilā.eñ to sahī

hosh meñ ā.eñge ham hosh se jaane vaale

kitne ahbāb 'rishī' ishq kā dam bharte haiñ

kitne hote haiñ magar naaz uThāne vaale

aatish-e-hijr ko ashkon se bujhane wale

tujh ko rone bhi na denge ye zamane wale

zahr-e-gham kha to sahi ai dil-e-mahrum-e-karam

pursish-e-haal ko aa jaenge aane wale

yaad aate hain to aae hi chale jate hain

dil se jate hain kahan dil se bhulane wale

dawa-e-did abas jurat-e-didar ghalat

aap mein aa na sake aap ko pane wale

jab se dekha hai tujhe main ne ye main dekhta hun

mujh ko diwana samajhte hain zamane wale

dil mein bhi baste hain arman-o-tamanna ki tarah

nur ban kar meri nazron mein samane wale

wo zara mast nigahon se pilaen to sahi

hosh mein aaenge hum hosh se jaane wale

kitne ahbab 'rishi' ishq ka dam bharte hain

kitne hote hain magar naz uThane wale