aatish-e-ishq mein jalta hai to jal jaane de

ātish-e-ishq meñ jaltā hai to jal jaane de

dil-e-be-tāb ke armāñ to nikal jaane de

nahīñ marzī na atā kar mire dil ko taskīñ

shiddat-e-ġham meñ kuchh aañsū to nikal jaane de

un kā ho jā.ūñgā maiñ vo mire ho jā.eñge

lamha-e-gardish-e-ayyām to Tal jaane de

terī mahfil meñ jahāñ sham.eñ haiñ aur jalve bhī

ik charāġh-e-nigah-e-shauq bhī jal jaane de

terī mahfil meñ bhī aa.egā 'musavvir' ik din

dasht-e-vahshat meñ zarā dil to bahal jaane de

aatish-e-ishq mein jalta hai to jal jaane de

dil-e-be-tab ke arman to nikal jaane de

nahin marzi na ata kar mere dil ko taskin

shiddat-e-gham mein kuchh aansu to nikal jaane de

un ka ho jaunga main wo mere ho jaenge

lamha-e-gardish-e-ayyam to Tal jaane de

teri mahfil mein jahan shamen hain aur jalwe bhi

ek charagh-e-nigah-e-shauq bhi jal jaane de

teri mahfil mein bhi aaega 'musawwir' ek din

dasht-e-wahshat mein zara dil to bahal jaane de