aatish-e-ishq ne aisa hi jalaya mujhko

ātish-e-ishq ne aisā hī jalāyā mujh ko

ki jahannum ne bhī muñh dekh chhupāyā mujh ko

be-ḳhabar kar diyā kaunain se yaaro pal meñ

gardish-e-chashm se jab jaam pilāyā mujh ko

maiñ kahā dil se ki kyā tujh ko huā vo bolā

ek baazī meñ in āñkhoñ ne harāyā mujh ko

chashm us shoḳh kī shoḳhī kā bayāñ shoḳhī hai

tarfat-ul-ain meñ dil le ke khijāyā mujh ko

dil meñ thā shauq kā iz.hār-o-bayāñ sab kiije

lekin us chashm lajīlī ne lajāyā mujh ko

abr-e-bārāñ kā bahut shor-o-shaġhab dekhā thā

iiñ pe us ashk ke tūfāñ ne bahāyā mujh ko

laḳht-e-dil bolā 'alī' chashm kī taqsīr ravā

dār-e-mizhgāñ pe abas tū ne chaḌhāyā mujh ko

aatish-e-ishq ne aisa hi jalaya mujh ko

ki jahannum ne bhi munh dekh chhupaya mujh ko

be-KHabar kar diya kaunain se yaro pal mein

gardish-e-chashm se jab jam pilaya mujh ko

main kaha dil se ki kya tujh ko hua wo bola

ek bazi mein in aankhon ne haraya mujh ko

chashm us shoKH ki shoKHi ka bayan shoKHi hai

tarfat-ul-ain mein dil le ke khijaya mujh ko

dil mein tha shauq ka izhaar-o-bayan sab kije

lekin us chashm lajili ne lajaya mujh ko

abr-e-baran ka bahut shor-o-shaghab dekha tha

in pe us ashk ke tufan ne bahaya mujh ko

laKHt-e-dil bola 'ali' chashm ki taqsir rawa

dar-e-mizhgan pe abas tu ne chaDhaya mujh ko