aawargam-e-sahra ku-e-sanam na DhunDen

āvārgām-e-sahrā kū-e-sanam na DhūñDeñ

jalvoñ kī vo bahāreñ zulfoñ ke ḳham na DhūñDeñ

ai shahr-e-sañg tujh meñ zaḳhmoñ kī kyā kamī hai

teġh-e-adā-e-jalva behtar hai ham na DhūñDeñ

vo ābrū-e-vahshat laa.eñ to ab kahāñ se

vo jannat-e-tamannā vo dasht-e-ġham na DhūñDeñ

hāsil na hogā kuchh bhī juz dāġh-o-dard-e-ibrat

ahl-e-vafā hamārā naqsh-e-qadam na DhūñDeñ

maqsad hai sirf itnā va.adoñ kī chāñdnī kā

ḳhvāb-e-sahar to dekheñ ta.abīr ham na DhūñDeñ

ham be-niyāz guzre shohrat kī sāzishoñ se

nām-o-nishāñ hamārā ahl-e-qalam na DhūñDeñ

jaañ dī 'sarosh' ham ne rāh-e-ḳhulūs-e-ġham meñ

fard-e-amal hamārī dair-o-haram na DhūñDeñ

aawargam-e-sahra ku-e-sanam na DhunDen

jalwon ki wo bahaaren zulfon ke KHam na DhunDen

ai shahr-e-sang tujh mein zaKHmon ki kya kami hai

tegh-e-ada-e-jalwa behtar hai hum na DhunDen

wo aabru-e-wahshat laen to ab kahan se

wo jannat-e-tamanna wo dasht-e-gham na DhunDen

hasil na hoga kuchh bhi juz dagh-o-dard-e-ibrat

ahl-e-wafa hamara naqsh-e-qadam na DhunDen

maqsad hai sirf itna wadon ki chandni ka

KHwab-e-sahar to dekhen tabir hum na DhunDen

hum be-niyaz guzre shohrat ki sazishon se

nam-o-nishan hamara ahl-e-qalam na DhunDen

jaan di 'sarosh' hum ne rah-e-KHulus-e-gham mein

fard-e-amal hamari dair-o-haram na DhunDen