aawaz apne dil ki hun bang-e-dara nahin

āvāz apne dil kī huuñ bāñg-e-darā nahīñ

aa.e na mere paas jo dard āshnā nahīñ

ġhairoñ se bhī nibāh tumhārā na ho sakā

kyā ab bhī ye kahoge ki tum bevafā nahīñ

chehroñ pe iḳhtilāf sadāoñ meñ intishār

is shahr-e-sañg-dil meñ koī ham-navā nahīñ

yuuñ gumrahī meñ aaj hai har shaḳhs mubtalā

jaise zamāne bhar meñ koī rahnumā nahīñ

manzil kidhar hai aur kidhar rāsta 'kamāl'

vo kyā batā.e jis ko ḳhud apnā patā nahīñ

aawaz apne dil ki hun bang-e-dara nahin

aae na mere pas jo dard aashna nahin

ghairon se bhi nibah tumhaara na ho saka

kya ab bhi ye kahoge ki tum bewafa nahin

chehron pe iKHtilaf sadaon mein intishaar

is shahr-e-sang-dil mein koi ham-nawa nahin

yun gumrahi mein aaj hai har shaKHs mubtala

jaise zamane bhar mein koi rahnuma nahin

manzil kidhar hai aur kidhar rasta 'kamal'

wo kya batae jis ko KHud apna pata nahin