aaya hai ek shaKHs ajab aan-ban ka

aayā hai ek shaḳhs ajab ān-bān kā

naqsha badal gayā hai purāne makān kā

taare se TūTte haiñ abhī tak idhar-udhar

baaqī hai kuchh nasha abhī kal kī uḌaan kā

kālak sī jam rahī hai chamaktī zamīn par

sūraj se jal uThā hai varaq āsmān kā

dariyā meñ duur duur talak kashtiyāñ na thiiñ

ḳhatra na thā havā ko kisī bādbān kā

donoñ ke dil meñ ḳhauf thā maidān-e-jañg meñ

donoñ kā ḳhauf fāsla thā darmiyān kā

'alvī' kivāḌ khol ke dekhā to kuchh na thā

vo to qusūr thā mire vahm-o-gumān kā

aaya hai ek shaKHs ajab aan-ban ka

naqsha badal gaya hai purane makan ka

tare se TuTte hain abhi tak idhar-udhar

baqi hai kuchh nasha abhi kal ki uDan ka

kalak si jam rahi hai chamakti zamin par

suraj se jal uTha hai waraq aasman ka

dariya mein dur dur talak kashtiyan na thin

KHatra na tha hawa ko kisi baadban ka

donon ke dil mein KHauf tha maidan-e-jang mein

donon ka KHauf fasla tha darmiyan ka

'alwi' kiwaD khol ke dekha to kuchh na tha

wo to qusur tha mere wahm-o-guman ka