aaya jo mausam-e-gul to ye hisab hoga

aayā jo mausam-e-gul to ye hisāb hogā

ham hoñge yaar hogā jām-e-sharāb hogā

nāloñ se apnī ik din vo inqalāb hogā

dam bhar meñ āsmāñ kā aalam ḳharāb hogā

dikhlā.eñge tujhe ham dāġh-e-jigar kā aalam

muñh is taraf kabhī to ai āftāb hogā

ai zāhid-e-riyā.ī dekhī namāz terī

niyyat agar yahī hai to kyā savāb hogā

vo radd-e-ḳhalq huuñ maiñ gar Duub kar marūñgā

murda mirā vabāl-e-dosh-e-habāb hogā

vo mast haiñ idhar to rakhte nahīñ haiñ sāġhar

maġhrib se haañ numāyāñ jab āftāb hogā

ai zūd-ranj tujh par jo log jaan deñge

rah rah ke turbatoñ meñ un par azaab hogā

ḳhūn-e-siyā.ush ik din dikhlā.egā ḳharābī

is zulm kā evaz ai afrāsiyāb hogā

tū naqd-e-dil ko le kar mukrā tū hī Thahar jā

roz-e-hisāb mere tere hisāb hogā

allāh re un kā ġhussa itnā nahīñ samajhte

kyūñkar koī jiyegā jab yuuñ itaab hogā

dāġh-e-jigar ko le kar jā.eñge ham jo ai dil

jannat meñ hūriyoñ ko rahnā azaab hogā

kyā sair hogī vo mah laayā agar harārā

chehra jo tamtamāyā to āftāb hogā

vo riñd huuñ maiñ zāhid aane de hashr kā din

us roz bhī ye banda mast-e-sharāb hogā

barsāt hai bahāreñ sāqī-e-barq-vash ko

chhāyā huā chaman par kaisā sahāb hogā

ai mehr-vash to kyūñkar parde meñ chhup sakegā

abr-e-tunak kī sūrat muñh par naqāb hogā

ai charḳh-e-pīr ab to ye haal hai sitam kā

kyā hogā jin dinoñ meñ terā shabāb hogā

ai muġhbachoñ tumhārā bāyāñ qadam maiñ luñgā

zāhid kā gar amāma rehn-e-sharāb hogā

dho.egā apne talve vo but jo sañg-pāsī

shīrīñ kā be-sutūñ par naqsha ḳharāb hogā

zulfoñ kā ishq kyūñkar un se bayāñ karūñgā

hāl-e-dil-e-pareshāñ gūñge kā ḳhvāb hogā

sar-kushtagī meñ merā kyā saath de sakegā

ai āsmāñ Thahar jā nā-haq ḳharāb hogā

furqat meñ zabt-e-nāla ham se na ho sakegā

qaabū meñ dil na hogā jab iztirāb hogā

likkhe kī kyā ḳhabar thī ye kaun jāntā thā

laila ke saath paḌh kar majnūñ ḳharāb hogā

īmān tum 'sabā' kā us vaqt dekh lenā

āñkhoñ meñ dam laboñ par yā bū-turāb hogā

aaya jo mausam-e-gul to ye hisab hoga

hum honge yar hoga jam-e-sharab hoga

nalon se apni ek din wo inqalab hoga

dam bhar mein aasman ka aalam KHarab hoga

dikhlaenge tujhe hum dagh-e-jigar ka aalam

munh is taraf kabhi to ai aaftab hoga

ai zahid-e-riyai dekhi namaz teri

niyyat agar yahi hai to kya sawab hoga

wo radd-e-KHalq hun main gar Dub kar marunga

murda mera wabaal-e-dosh-e-habab hoga

wo mast hain idhar to rakhte nahin hain saghar

maghrib se han numayan jab aaftab hoga

ai zud-ranj tujh par jo log jaan denge

rah rah ke turbaton mein un par azab hoga

KHun-e-siyaush ek din dikhlaega KHarabi

is zulm ka ewaz ai afrasiyab hoga

tu naqd-e-dil ko le kar mukra tu hi Thahar ja

roz-e-hisab mere tere hisab hoga

allah re un ka ghussa itna nahin samajhte

kyunkar koi jiyega jab yun itab hoga

dagh-e-jigar ko le kar jaenge hum jo ai dil

jannat mein huriyon ko rahna azab hoga

kya sair hogi wo mah laya agar harara

chehra jo tamtamaya to aaftab hoga

wo rind hun main zahid aane de hashr ka din

us roz bhi ye banda mast-e-sharab hoga

barsat hai bahaaren saqi-e-barq-wash ko

chhaya hua chaman par kaisa sahab hoga

ai mehr-wash to kyunkar parde mein chhup sakega

abr-e-tunak ki surat munh par naqab hoga

ai charKH-e-pir ab to ye haal hai sitam ka

kya hoga jin dinon mein tera shabab hoga

ai mughbachon tumhaara bayan qadam main lunga

zahid ka gar amama rehn-e-sharab hoga

dhoega apne talwe wo but jo sang-pasi

shirin ka be-sutun par naqsha KHarab hoga

zulfon ka ishq kyunkar un se bayan karunga

haal-e-dil-e-pareshan gunge ka KHwab hoga

sar-kushtagi mein mera kya sath de sakega

ai aasman Thahar ja na-haq KHarab hoga

furqat mein zabt-e-nala hum se na ho sakega

qabu mein dil na hoga jab iztirab hoga

likkhe ki kya KHabar thi ye kaun jaanta tha

laila ke sath paDh kar majnun KHarab hoga

iman tum 'saba' ka us waqt dekh lena

aankhon mein dam labon par ya bu-turab hoga