aaya na aab-e-rafta kabhi juebar mein

aayā na āb-e-rafta kabhī jūebār meñ

kaise qarār aa.e dil-e-be-qarār meñ

hañgām-e-sub.h-e-īd meñ bhī vo mazā kahāñ

jo lutf mil gayā hai shab-e-intizār meñ

bijlī girī thī kab ye kisī ko ḳhabar nahīñ

ab tak chaman meñ aag lagī hai bahār meñ

jab tak bikhar na jaa.e tirī zulf-e-ambarīñ

nik.hat kahāñ se aa.e nasīm-e-bahār meñ

fursat milī hai dil ko nasheman kī fikr se

phir barq kūñdne lagī har shāḳh-sār meñ

phir kis kī yaad aa.ī ki 'anvār' āj-kal

motī piro rahā huuñ garebāñ ke haar meñ

aaya na aab-e-rafta kabhi juebar mein

kaise qarar aae dil-e-be-qarar mein

hangam-e-subh-e-id mein bhi wo maza kahan

jo lutf mil gaya hai shab-e-intizar mein

bijli giri thi kab ye kisi ko KHabar nahin

ab tak chaman mein aag lagi hai bahaar mein

jab tak bikhar na jae teri zulf-e-ambarin

nikhat kahan se aae nasim-e-bahaar mein

fursat mili hai dil ko nasheman ki fikr se

phir barq kundne lagi har shaKH-sar mein

phir kis ki yaad aai ki 'anwar' aaj-kal

moti piro raha hun gareban ke haar mein