aaya nahin wo jaur ka KHugar tamam raat

aayā nahīñ vo jaur kā ḳhūgar tamām raat

taḌpā kiyā mirā dil-e-muztar tamām raat

niiñd us ke husn-e-ruḳh ke tasavvur meñ aa.ī thī

dekhā hai barq-e-tūr kā manzar tamām raat

ye raaz mujh pe sham' ke anjām se khulā

kaTtī hai hijr-e-yār meñ kyūñkar tamām raat

ai ham-nafas na pūchh shab-e-hijr kā 'azāb

āñkhoñ meñ kāTnī paḌī aksar tamām raat

ik ham na un kī yaad meñ jhapkā sake palak

ik vo ki mahv-e-bāda-o-sāġhar tamām raat

vaqt-e-sahar ye jaanā ki jaage haiñ ham magar

sotā rahā hamārā muqaddar tamām raat

sīñchā hai āñsuoñ se bahut naḳhl-e-ārzū

lekin samar na aa sakā 'jauhar' tamām raat

aaya nahin wo jaur ka KHugar tamam raat

taDpa kiya mera dil-e-muztar tamam raat

nind us ke husn-e-ruKH ke tasawwur mein aai thi

dekha hai barq-e-tur ka manzar tamam raat

ye raaz mujh pe sham' ke anjam se khula

kaTti hai hijr-e-yar mein kyunkar tamam raat

ai ham-nafas na puchh shab-e-hijr ka 'azab

aankhon mein kaTni paDi aksar tamam raat

ek hum na un ki yaad mein jhapka sake palak

ek wo ki mahw-e-baada-o-saghar tamam raat

waqt-e-sahar ye jaana ki jage hain hum magar

sota raha hamara muqaddar tamam raat

sincha hai aansuon se bahut naKHl-e-arzu

lekin samar na aa saka 'jauhar' tamam raat