آیا وہ روبرو کہ مری آنکھ کھل گئی

آیا وہ روبرو کہ مری آنکھ کھل گئی

افسوس آرزو کہ مری آنکھ کھل گئی

صد شکر میرے پاؤں کا چکر ہوا تمام

پھرتا تھا کو بہ کو کہ مری آنکھ کھل گئی

میں تشنہ لب رہا لب دریا بھی تشنہ لب

پہنچا کنار جو کہ مری آنکھ کھل گئی

ابھرا ہوں رات بحر ترنم میں ڈوب کر

بولا وہ خوش گلو کہ مری آنکھ کھل گئی

ناآشنائے فیض بہاراں ہی میں رہا

اٹھی گلوں سے بو کہ مری آنکھ کھل گئی

مجھ تشنہ لب کی تشنہ لبی کا کمال دیکھ

ہاتھوں میں تھا سبو کہ مری آنکھ کھل گئی

ممکن نہیں کہ وقت سحر آنکھ لگ سکے

دیکھا وہ خوب رو کہ مری آنکھ کھل گئی

دشمن کا پچھلی رات ستارہ تھا اوج پر

تھا میرے روبرو کہ مری آنکھ کھل گئی

مرگ امرؔ کی بات غلط تھی خدا کا شکر

سننا تھی ہاؤ ہو کہ مری آنکھ کھل گئی