aazmaish ke samundar se guzarna bhi to hai

āzmā.ish ke samundar se guzarnā bhī to hai

apne ḳhvāboñ meñ na.e rangoñ ko bharnā bhī to hai

tum ne jiine ke liye āsā.isheñ sab kar to liiñ

tum ye shāyad bhuul baiThe ho ki marnā bhī to hai

phuul kī chāhat meñ tum ko hosh itnā bhī nahīñ

un ko paanā hai to kāñToñ se guzarnā bhī to hai

tum kisī se TuuT kar milte nahīñ ho haañ magar

ek sadqa muskurā kar baat karnā bhī to hai

jāntī huuñ ahd-e-hāzir hai parāganda bahut

par isī māhaul meñ mujh ko nikharnā bhī to hai

nashsha-e-azmat meñ tum ko yaad itnā bhī nahīñ

ek din shohrat ke ziine se utarnā bhī to hai

tum ne kāñTe bo diye rāhoñ meñ sochā tak nahīñ

kitne logoñ ko isī rah se guzarnā bhī to hai

zindagī kī ye jo ik tartīb hai 'nusrat' yahāñ

in anāsir ko bahar-sūrat bikharnā bhī to hai

aazmaish ke samundar se guzarna bhi to hai

apne KHwabon mein nae rangon ko bharna bhi to hai

tum ne jine ke liye aasaishen sab kar to lin

tum ye shayad bhul baiThe ho ki marna bhi to hai

phul ki chahat mein tum ko hosh itna bhi nahin

un ko pana hai to kanTon se guzarna bhi to hai

tum kisi se TuT kar milte nahin ho han magar

ek sadqa muskura kar baat karna bhi to hai

jaanti hun ahd-e-hazir hai paraganda bahut

par isi mahaul mein mujh ko nikharna bhi to hai

nashsha-e-azmat mein tum ko yaad itna bhi nahin

ek din shohrat ke zine se utarna bhi to hai

tum ne kanTe bo diye rahon mein socha tak nahin

kitne logon ko isi rah se guzarna bhi to hai

zindagi ki ye jo ek tartib hai 'nusrat' yahan

in anasir ko bahar-surat bikharna bhi to hai