aazmane ki zamane ko zarurat kya hai

āzmāne kī zamāne ko zarūrat kyā hai

ham se pūchho to batā deñge mohabbat kyā hai

ham ne piir aur faqīroñ se bahut pūchhā magar

jab huā 'ishq to jaanā ki 'ibādat kyā hai

ham ko aatā nahīñ ḳhāmoshiyāñ paḌhne kā hunar

vo hī batlā deñ unheñ ham se shikāyat kyā hai

merī ġhazleñ vo paḌheñge to samajh jā.eñge

bandagī kyā hai junūñ kyā hai 'aqīdat kyā hai

aap ne jis ko farishte kā diyā thā darja

us kī insānoñ sī fitrat hai to hairat kyā hai

un se bichhḌe to 'amit' aayā samajh ye ham ko

shāḳh se TuuTe hue pattoñ kī qīmat kyā hai

aazmane ki zamane ko zarurat kya hai

hum se puchho to bata denge mohabbat kya hai

hum ne pir aur faqiron se bahut puchha magar

jab hua 'ishq to jaana ki 'ibaadat kya hai

hum ko aata nahin KHamoshiyan paDhne ka hunar

wo hi batla den unhen hum se shikayat kya hai

meri ghazlen wo paDhenge to samajh jaenge

bandagi kya hai junun kya hai 'aqidat kya hai

aap ne jis ko farishte ka diya tha darja

us ki insanon si fitrat hai to hairat kya hai

un se bichhDe to 'amit' aaya samajh ye hum ko

shaKH se TuTe hue patton ki qimat kya hai