ab aa gae ho to raftagan ko bhi yaad rakhna

ab aa ga.e ho to raftagāñ ko bhī yaad rakhnā

bichhaḌte lamhoñ kī dāstāñ ko bhī yaad rakhnā

zamīñ pe apne qadam jamā kar na bhuul jaanā

saroñ pe Thahre is āsmāñ ko bhī yaad rakhnā

havā-e-tishna kā chhīn lenā makīn-e-jāñ ko

magar larazte hue makāñ ko bhī yaad rakhnā

sarāb āḳhir mirī hī āñkhoñ kā mo.ajaza hai

yaqīñ kī manzil meñ is gumāñ ko bhī yaad rakhnā

agarche ḳhvāhish kā aks lafzoñ meñ aa gayā hai

jo chashm-e-tar meñ hai is zabāñ ko bhī yaad rakhnā

tujhe ḳhabar hai ki ibtidā bhī hai intihā bhī

jahān-e-ma.anī meñ darmiyāñ ko bhī yaad rakhnā

kabhī jo aiboñ ke tiir ghā.el kareñ nazar ko

to ḳhvāhishoñ kī jhukī kamāñ ko bhī yaad rakhnā

ab aa gae ho to raftagan ko bhi yaad rakhna

bichhaDte lamhon ki dastan ko bhi yaad rakhna

zamin pe apne qadam jama kar na bhul jaana

saron pe Thahre is aasman ko bhi yaad rakhna

hawa-e-tishna ka chhin lena makin-e-jaan ko

magar larazte hue makan ko bhi yaad rakhna

sarab aaKHir meri hi aankhon ka moajaza hai

yaqin ki manzil mein is guman ko bhi yaad rakhna

agarche KHwahish ka aks lafzon mein aa gaya hai

jo chashm-e-tar mein hai is zaban ko bhi yaad rakhna

tujhe KHabar hai ki ibtida bhi hai intiha bhi

jahan-e-mani mein darmiyan ko bhi yaad rakhna

kabhi jo aibon ke tir ghael karen nazar ko

to KHwahishon ki jhuki kaman ko bhi yaad rakhna