ab aa gaya hai jahan mein to muskuraata ja

ab aa gayā hai jahāñ meñ to muskurātā jā

chaman ke phuul diloñ ke kañval khilātā jā

adam hayāt se pahle adam hayāt ke ba.ad

ye ek pal hai use jāvedāñ banātā jā

bhaTak rahī hai añdhere meñ zindagī kī barāt

koī charāġh sar-e-rahguzar jalātā jā

guzar chaman se misāl-e-nasīm-e-sub.h-e-bahār

guloñ ko chheḌ ke kāñToñ ko gudgudātā jā

rah-e-darāz hai aur duur shauq kī manzil

garāñ hai marhala-e-umr giit gaatā jā

balā se bazm meñ gar zauq-e-naġhmagī kam hai

navā-e-talḳh ko kuchh talḳh-tar banātā jā

jo ho sake to badal zindagī ko ḳhud varna

nazhād-e-nau ko tarīq-e-junūñ sikhātā jā

dikhā ke jalva-e-fardā banā de dīvāna

na.e zamāne ke ruḳh se naqāb uThātā jā

bahut dinoñ se dil-o-jāñ kī mahfileñ haiñ udaas

koī tarāna koī dāstāñ sunātā jā

ab aa gaya hai jahan mein to muskuraata ja

chaman ke phul dilon ke kanwal khilata ja

adam hayat se pahle adam hayat ke baad

ye ek pal hai use jawedan banata ja

bhaTak rahi hai andhere mein zindagi ki baraat

koi charagh sar-e-rahguzar jalata ja

guzar chaman se misal-e-nasim-e-subh-e-bahaar

gulon ko chheD ke kanTon ko gudgudata ja

rah-e-daraaz hai aur dur shauq ki manzil

garan hai marhala-e-umr git gata ja

bala se bazm mein gar zauq-e-naghmagi kam hai

nawa-e-talKH ko kuchh talKH-tar banata ja

jo ho sake to badal zindagi ko KHud warna

nazhad-e-nau ko tariq-e-junun sikhata ja

dikha ke jalwa-e-farda bana de diwana

nae zamane ke ruKH se naqab uThata ja

bahut dinon se dil-o-jaan ki mahfilen hain udas

koi tarana koi dastan sunata ja