ab aae ho sada sun kar gajar ki

ab aa.e ho sadā sun kar gajar kī

kaho jī shab kahāñ tum ne basar kī

sahar ko dafn kar ke jā.iyegā

musībat aur hai ik rāt-bhar kī

qafas meñ band karnā thā jo taqdīr

nadāmat kyuuñ mujhe dī bāl-o-par kī

guzar jā.egī jo guzregī ham par

chalo jī raah lo tum apne ghar kī

abhī tū jaan le le ai ġham-e-ishq

musībat kaun uThā.e umr-bhar kī

ḳhudā ke vāste yaaro sambhālo

ki phir shiddat huī dard-e-jigar kī

tarashshoh āñsuoñ kā ho rahā hai

ghaTā umDī huī hai chashm-e-tar kī

na boleñge tumhāre ḳhauf se ham

hilā.eñge magar zanjīr dar kī

na aanā tum ijāzat māñgne ko

na dikhlānā hameñ sūrat safar kī

koī dam kā bakheḌā rah gayā hai

jigar tak barchhiyāñ pahuñcheñ nazar kī

hameñ fassād kā muñh dekhnā hai

uThānī hai musībat neshtar kī

habāb-āsā hai lutf-e-zindagānī

haqīqat kuchh nahīñ hotī bashar kī

'nasīm' ab dil katāñ kī tarah hai chaak

mohabbat meñ kisī rashk-e-qamar kī

ab aae ho sada sun kar gajar ki

kaho ji shab kahan tum ne basar ki

sahar ko dafn kar ke jaiyega

musibat aur hai ek raat-bhar ki

qafas mein band karna tha jo taqdir

nadamat kyun mujhe di baal-o-par ki

guzar jaegi jo guzregi hum par

chalo ji rah lo tum apne ghar ki

abhi tu jaan le le ai gham-e-ishq

musibat kaun uThae umr-bhar ki

KHuda ke waste yaro sambhaalo

ki phir shiddat hui dard-e-jigar ki

tarashshoh aansuon ka ho raha hai

ghaTa umDi hui hai chashm-e-tar ki

na bolenge tumhaare KHauf se hum

hilaenge magar zanjir dar ki

na aana tum ijazat mangne ko

na dikhlana hamein surat safar ki

koi dam ka bakheDa rah gaya hai

jigar tak barchhiyan pahunchen nazar ki

hamein fassad ka munh dekhna hai

uThani hai musibat neshtar ki

habab-asa hai lutf-e-zindagani

haqiqat kuchh nahin hoti bashar ki

'nasim' ab dil katan ki tarah hai chaak

mohabbat mein kisi rashk-e-qamar ki