ab aaftab-e-munawwar pe qurb-e-sham hua

ab āftāb-e-munavvar pe qurb-e-shām huā

ik aur saal mirī 'umr kā tamām huā

ragoñ meñ gardish-e-ḳhūñ kā ġhulām Thahrā hai

na us badan kā kabhī mujh se ehtirām huā

mire chahār-taraf hai hisār-e-mahrūmī

tamām-umr kaTī aur na koī kaam huā

koī zamīn na daldal na āsmān hai ab

kahāñ pahuñch ke mirī rah kā iḳhtitām huā

'ajab latīf sī tezābiyat thī lahje meñ

baḌe ḳhulūs se jis dam vo ham-kalām huā

sunā hai raat farishte chhupe the ma.abad meñ

hamāre shahr meñ phir aaj qatl-e-ām huā

hazār qatl ke badle meñ ye sa.ādat hai

ki ek shaḳhs kisī qaum kā imaam huā

ab aaftab-e-munawwar pe qurb-e-sham hua

ek aur sal meri 'umr ka tamam hua

ragon mein gardish-e-KHun ka ghulam Thahra hai

na us badan ka kabhi mujh se ehtiram hua

mere chahaar-taraf hai hisar-e-mahrumi

tamam-umr kaTi aur na koi kaam hua

koi zamin na daldal na aasman hai ab

kahan pahunch ke meri rah ka iKHtitam hua

'ajab latif si tezabiyat thi lahje mein

baDe KHulus se jis dam wo ham-kalam hua

suna hai raat farishte chhupe the mabad mein

hamare shahr mein phir aaj qatl-e-am hua

hazar qatl ke badle mein ye saadat hai

ki ek shaKHs kisi qaum ka imam hua