اب آئنے کو شکل بھی دکھلا نہ پائیں گے

اب آئنے کو شکل بھی دکھلا نہ پائیں گے

کچھ لوگ اپنے آپ کو سمجھا نہ پائیں گے

آئیں گے پاس بیٹھ کے دیں گے تسلیاں

لیکن کسی کا زخم وہ سہلا نہ پائیں گے

کہنی تھی اپنی بات جو اک بار کہہ چکے

ہر دن وہی بیان تو دہرا نہ پائیں گے

کتنی اداس گھر کی ہے دہلیز آج کل

جب سے وہ کہہ گئے ہیں کہ اب آ نہ پائیں گے

مت بھولیے کہ آج کے بچے ذہین ہیں

پریوں کی داستان سے بہلا نہ پائیں گے

مانگیں بھی سر جھکا کے ترے در پہ اور کیا

پہلے سے جو ملا ہے وہ لوٹا نہ پائیں گے

اب تو اتر گئے ہیں تمہاری نظرؔ سے ہم

خود کو کسی مقام پہ پہنچا نہ پائیں گے