ab aaine ko shakl bhi dikhla na paenge

ab aa.ine ko shakl bhī dikhlā na pā.eñge

kuchh log apne aap ko samjhā na pā.eñge

ā.eñge paas baiTh ke deñge tasalliyāñ

lekin kisī kā zaḳhm vo sahlā na pā.eñge

kahnī thī apnī baat jo ik baar kah chuke

har din vahī bayān to dohrā na pā.eñge

kitnī udaas ghar kī hai dahlīz āj-kal

jab se vo kah ga.e haiñ ki ab aa na pā.eñge

mat bhūliye ki aaj ke bachche zahīn haiñ

pariyoñ kī dāstān se bahlā na pā.eñge

māñgeñ bhī sar jhukā ke tire dar pe aur kyā

pahle se jo milā hai vo lauTā na pā.eñge

ab to utar ga.e haiñ tumhārī 'nazar' se ham

ḳhud ko kisī maqām pe pahuñchā na pā.eñge

ab aaine ko shakl bhi dikhla na paenge

kuchh log apne aap ko samjha na paenge

aaenge pas baiTh ke denge tasalliyan

lekin kisi ka zaKHm wo sahla na paenge

kahni thi apni baat jo ek bar kah chuke

har din wahi bayan to dohra na paenge

kitni udas ghar ki hai dahliz aaj-kal

jab se wo kah gae hain ki ab aa na paenge

mat bhuliye ki aaj ke bachche zahin hain

pariyon ki dastan se bahla na paenge

mangen bhi sar jhuka ke tere dar pe aur kya

pahle se jo mila hai wo lauTa na paenge

ab to utar gae hain tumhaari 'nazar' se hum

KHud ko kisi maqam pe pahuncha na paenge