ab ada humse namaz-e-zindagi hoti nahin

ab adā ham se namāz-e-zindagī hotī nahīñ

dil jalāne se bhī ab to raushnī hotī nahīñ

zindagānī is qadar be-kaif hai kuchh in dinoñ

un ke aa jaane se bhī ab to ḳhushī hotī nahīñ

tez ho jaatī thī dhaḌkan aate hī terā ḳhayāl

naam terā sun ke bhī ab sansanī hotī nahīñ

husn pe martī hai duniyā jis pe aatā hai zavāl

ham se aisī chand roza āshiqī hotī nahīñ

yuuñ to ho jaatī haiñ puurī dhīre dhīre ḳhvāhisheñ

jis kī ham ko chaah hai bas ik vahī hotī nahīñ

pyaar jis ne jitnā māñgā us ko itnā de diyā

kyā ḳhazāna hai ki us meñ kuchh kamī hotī nahīñ

zabt-e-ġham kī sarhadoñ ko ham ne 'hairat' chhū liyā

ġham hoñ chāhe kitne āñkhoñ meñ namī hotī nahīñ

ab ada hum se namaz-e-zindagi hoti nahin

dil jalane se bhi ab to raushni hoti nahin

zindagani is qadar be-kaif hai kuchh in dinon

un ke aa jaane se bhi ab to KHushi hoti nahin

tez ho jati thi dhaDkan aate hi tera KHayal

nam tera sun ke bhi ab sansani hoti nahin

husn pe marti hai duniya jis pe aata hai zawal

hum se aisi chand roza aashiqi hoti nahin

yun to ho jati hain puri dhire dhire KHwahishen

jis ki hum ko chah hai bas ek wahi hoti nahin

pyar jis ne jitna manga us ko itna de diya

kya KHazana hai ki us mein kuchh kami hoti nahin

zabt-e-gham ki sarhadon ko hum ne 'hairat' chhu liya

gham hon chahe kitne aankhon mein nami hoti nahin