ab aisi na-umidi bhi nahin hai

ab aisī nā-umīdī bhī nahīñ hai

bahār aa.egī phir ham ko yaqīñ hai

taġhayyur ko lagā kartī haiñ sadiyāñ

karishma do ghaḌī kā ye nahīñ hai

na ho paa.e na hoñge fāsle kam

azal se yūñhī gardish meñ zamīñ hai

yahī hai rishta-e-tār-e-nafas ab

jo ik nashtar sā dil meñ jāguzīñ hai

vahī rah rah ke ham se pūchhte haiñ

bayāñ jis baat kā āsāñ nahīñ hai

na pūchho ham se mausam kī haqīqat

mizāj-e-yār kī chīn-e-jabīñ hai

ham ab ke ḳhatm samjhe the kahānī

dil-e-pur-azm tujh ko āfrīñ hai

chalo ik din 'sahar' us but se mil aa.eñ

bahut din se use dekhā nahīñ hai

ab aisi na-umidi bhi nahin hai

bahaar aaegi phir hum ko yaqin hai

taghayyur ko laga karti hain sadiyan

karishma do ghaDi ka ye nahin hai

na ho pae na honge fasle kam

azal se yunhi gardish mein zamin hai

yahi hai rishta-e-tar-e-nafas ab

jo ek nashtar sa dil mein jaguzin hai

wahi rah rah ke hum se puchhte hain

bayan jis baat ka aasan nahin hai

na puchho hum se mausam ki haqiqat

mizaj-e-yar ki chin-e-jabin hai

hum ab ke KHatm samjhe the kahani

dil-e-pur-azm tujh ko aafrin hai

chalo ek din 'sahar' us but se mil aaen

bahut din se use dekha nahin hai