ab aisi waisi mohabbat ko kya sambhaalun main

ab aisī vaisī mohabbat ko kyā sambhālūñ maiñ

ye ḳhār-o-ḳhas kā badan phūñk hī na Dālūñ maiñ

gar ek dil se nahīñ bhartā mere yaar kā dil

to ik badan meñ bhalā kitne saañp pālūñ maiñ

na qabr kī hai jagah shahr meñ na masjid kī

batāo ruuh ke kāñTe kahāñ nikālūñ maiñ

sadāqatoñ pe burā vaqt aane vaalā hai

ab us ke kāñpte hāthoñ se ā.īna luuñ maiñ

ka.ī zamāne mirā intizār karte haiñ

zamīñ ruke to koī rāstā nikālūñ maiñ

maiñ aañkh khol ke chalne kī lat na chhoḌ sakā

nahīñ to ek na ik roz ḳhud ko pā luuñ maiñ

hazār zaḳhm mile haiñ magar nahīñ miltā

vo ek sañg jise aa.ina banā luuñ maiñ

suno maiñ hijr meñ qaa.el nahīñ huuñ rone kā

kaho to jashn ye apnī tarah manā luuñ maiñ

ab aisi waisi mohabbat ko kya sambhaalun main

ye KHar-o-KHas ka badan phunk hi na Dalun main

gar ek dil se nahin bharta mere yar ka dil

to ek badan mein bhala kitne sanp palun main

na qabr ki hai jagah shahr mein na masjid ki

batao ruh ke kanTe kahan nikalun main

sadaqaton pe bura waqt aane wala hai

ab us ke kanpte hathon se aaina lun main

kai zamane mera intizar karte hain

zamin ruke to koi rasta nikalun main

main aankh khol ke chalne ki lat na chhoD saka

nahin to ek na ek roz KHud ko pa lun main

hazar zaKHm mile hain magar nahin milta

wo ek sang jise aaina bana lun main

suno main hijr mein qael nahin hun rone ka

kaho to jashn ye apni tarah mana lun main