ab aur daman-e-dil tar-tar kya karte

ab aur dāman-e-dil tār-tār kyā karte

alam-nasīb umīd-e-bahār kyā karte

samajh liyā thā sar-e-shām tum na aaoge

tamām raat bhalā intizār kyā karte

subuk-ḳhirām the sab shāhrāh-e-resham par

ye mauj-e-ḳhūñ milī jin ko vo paar kyā karte

thī jab nasīb meñ āvārgī bagūloñ ke

bikhar na jaate jo misl-e-ġhubār kyā karte

hadaf banāte kise kaj-kulāh phir āḳhir

junūñ-pasand na hote to daar kyā karte

vo nik.hat-e-gul-e-tar ban ke dil meñ Thahrā thā

tamām shahr ke zohra-nigār kyā karte

ye jānte the ki bijlī vahīñ pe girnī hai

to us se rahm talab baar baar kyā karte

dar-e-qubūl hī jis ko na yaad rah paayā

use duāoñ meñ apnī shumār kyā karte

jhapakne paa.eñ na palkeñ tamām shab 'az.har'

ab aur dīda-e-ḳhū-nāba-bār kyā karte

ab aur daman-e-dil tar-tar kya karte

alam-nasib umid-e-bahaar kya karte

samajh liya tha sar-e-sham tum na aaoge

tamam raat bhala intizar kya karte

subuk-KHiram the sab shahrah-e-resham par

ye mauj-e-KHun mili jin ko wo par kya karte

thi jab nasib mein aawargi bagulon ke

bikhar na jate jo misl-e-ghubar kya karte

hadaf banate kise kaj-kulah phir aaKHir

junun-pasand na hote to dar kya karte

wo nikhat-e-gul-e-tar ban ke dil mein Thahra tha

tamam shahr ke zohra-nigar kya karte

ye jaante the ki bijli wahin pe girni hai

to us se rahm talab bar bar kya karte

dar-e-qubul hi jis ko na yaad rah paya

use duaon mein apni shumar kya karte

jhapakne paen na palken tamam shab 'azhar'

ab aur dida-e-KHu-naba-bar kya karte