ab baad-e-fana kis ko bataun ki main kya tha

ab ba.ad-e-fanā kis ko batā.ūñ ki maiñ kyā thā

ik ḳhvāb thā aur ḳhvāb bhī ta.abīr-numā thā

ab tak vo samāñ yaad hai jab hosh-ba-jā thā

har shai meñ mujhe lutf thā har shai meñ mazā thā

tum jaur-o-jafā mujh pe na karte to burā thā

hote na agar zulm to kyā lutf-e-vafā thā

kuchh yaad haiñ āġhāz-e-mohabbat kī vo bāteñ

aur bhūlne vaale yahī paimān-e-vafā thā

mauqūf hai dīdār faqat zauq-e-nazar par

aksar ke liye tuur ke sho.aloñ meñ ḳhudā thā

yuuñ maut pe maiñ jaan ko qurbān na kartā

tū ne mujhe shāyad koī paiġhām diyā thā

hastī-o-adam donoñ ham-āġhosh the goyā

tasvīr kā ik ruḳh thā fanā ek baqā thā

matlūb ke dil meñ bhī talab thī mirī 'shaukat'

dekhā use maiñ ne to mujhe dekh rahā thā

ab baad-e-fana kis ko bataun ki main kya tha

ek KHwab tha aur KHwab bhi tabir-numa tha

ab tak wo saman yaad hai jab hosh-ba-ja tha

har shai mein mujhe lutf tha har shai mein maza tha

tum jaur-o-jafa mujh pe na karte to bura tha

hote na agar zulm to kya lutf-e-wafa tha

kuchh yaad hain aaghaz-e-mohabbat ki wo baaten

aur bhulne wale yahi paiman-e-wafa tha

mauquf hai didar faqat zauq-e-nazar par

aksar ke liye tur ke shoalon mein KHuda tha

yun maut pe main jaan ko qurban na karta

tu ne mujhe shayad koi paigham diya tha

hasti-o-adam donon ham-aghosh the goya

taswir ka ek ruKH tha fana ek baqa tha

matlub ke dil mein bhi talab thi meri 'shaukat'

dekha use main ne to mujhe dekh raha tha