ab bhi KHamosh agar ho to kahan bologe

ab bhī ḳhāmosh agar ho to kahāñ bologe

mujh ko lagtā nahīñ tum haq kī zabāñ bologe

vaqt ke saath ye luknat bhī chalī jā.egī

naam aayā vo zabāñ par to ravāñ bologe

tum ko ho jā.egī jis roz mohabbat ḳhud se

maiñ na kahtā thā ki tum ḳhud ko javāñ bologe

ḳhilqat-e-shahr sunegī ye tumhārī bāteñ

ḳhud hī ban jā.egā māhaul jahāñ bologe

sāhib-e-‘ilm agar ho to kisī jāhil se

baat karne ko bhī lamhoñ kā ziyāñ bologe

aur to kuchh nahīñ bas log hañseñge tum par

Thahre paanī ko agar āb-e-ravāñ bologe

ai mire dost mujhe tum se ye ummīd na thī

tum mire sāmne dushman kī zabāñ bologe

ab bhi KHamosh agar ho to kahan bologe

mujh ko lagta nahin tum haq ki zaban bologe

waqt ke sath ye luknat bhi chali jaegi

nam aaya wo zaban par to rawan bologe

tum ko ho jaegi jis roz mohabbat KHud se

main na kahta tha ki tum KHud ko jawan bologe

KHilqat-e-shahr sunegi ye tumhaari baaten

KHud hi ban jaega mahaul jahan bologe

sahib-e-‘ilm agar ho to kisi jahil se

baat karne ko bhi lamhon ka ziyan bologe

aur to kuchh nahin bas log hansenge tum par

Thahre pani ko agar aab-e-rawan bologe

ai mere dost mujhe tum se ye ummid na thi

tum mere samne dushman ki zaban bologe