ab bhi rahta hai KHayalon mein samaya hua shaKHs

ab bhī rahtā hai ḳhayāloñ meñ samāyā huā shaḳhs

apnī nādānī se raste meñ gañvāyā huā shaḳhs

merī qismat meñ nahīñ thā so vo merā na huā

haa.e vo ḳhaas 'ināyat se banāyā huā shaḳhs

jo bhī koshish kī bhulāne kī vo nākām rahī

dil se jaatā hī nahīñ dil meñ samāyā huā shaḳhs

kitnī āsānī se duniyā ne use chhīn liyā

ek muddat kī riyāzat se kamāyā huā shaḳhs

maiñ ne to tark-e-ta'alluq kī qasam khaa.ī thī

yaad kyoñ aatā hai mujh ko vo bhulāyā huā shaḳhs

maiñ ne rakhā thā jise raaz vo pinhāñ na rahā

mere chehre se 'ayāñ hai vo gañvāyā huā shaḳhs

in du'āoñ ke havāle se gurezāñ huā kyoñ

jin ke bā'is hai ye taḳhlīq meñ aayā huā shaḳhs

nā-gahānī meñ achānak bhī chale jaate haiñ log

kyā bulāve pe faqat jā.egā aayā huā shaḳhs

fāsle saare miTā detī hai chāhat 'shamsa'

dil ke nazdīk hai vo duur se aayā huā shaḳhs

ab bhi rahta hai KHayalon mein samaya hua shaKHs

apni nadani se raste mein ganwaya hua shaKHs

meri qismat mein nahin tha so wo mera na hua

hae wo KHas 'inayat se banaya hua shaKHs

jo bhi koshish ki bhulane ki wo nakaam rahi

dil se jata hi nahin dil mein samaya hua shaKHs

kitni aasani se duniya ne use chhin liya

ek muddat ki riyazat se kamaya hua shaKHs

main ne to tark-e-ta'alluq ki qasam khai thi

yaad kyon aata hai mujh ko wo bhulaya hua shaKHs

main ne rakha tha jise raaz wo pinhan na raha

mere chehre se 'ayan hai wo ganwaya hua shaKHs

in du'aon ke hawale se gurezan hua kyon

jin ke ba'is hai ye taKHliq mein aaya hua shaKHs

na-gahani mein achanak bhi chale jate hain log

kya bulawe pe faqat jaega aaya hua shaKHs

fasle sare miTa deti hai chahat 'shamsa'

dil ke nazdik hai wo dur se aaya hua shaKHs