ab bhi zarron pe sitaron ka guman hai ki nahin

ab bhī zarroñ pe sitāroñ kā gumāñ hai ki nahīñ

zer-e-pā ab bhī tire kāhkashāñ hai ki nahīñ

ab bhī vo jashn-e-tarab hai ki nahīñ maqtal meñ

ik tamāshe ko hujūm-e-nigarāñ hai ki nahīñ

ab bhī fariyād-ba-lab hai ki nahīñ rāñda-e-ishq

vo hī be-chārgī-e-dil-zadagāñ hai ki nahīñ

kahiye nam hai ki nahīñ chashm-e-nadāmat-āsār

qāfile vāloñ ko ehsās-e-ziyāñ hai ki nahīñ

har gul-e-nam ke liye hai ki nahīñ gardish-e-chāk

ye jahāñ kārgah-e-kūza-garāñ hai ki nahīñ

vo mirā dushman-e-jāñ hai ki nahīñ sañg-ba-dast

rā.egāñ koshish-e-sad-shīsha-garāñ hai ki nahīñ

'tishna' kuchh sab se judā hai ki nahīñ terī ġhazal

munfarid 'saudā' kā andāz-e-bayāñ hai ki nahīñ

ab bhi zarron pe sitaron ka guman hai ki nahin

zer-e-pa ab bhi tere kahkashan hai ki nahin

ab bhi wo jashn-e-tarab hai ki nahin maqtal mein

ek tamashe ko hujum-e-nigaran hai ki nahin

ab bhi fariyaad-ba-lab hai ki nahin randa-e-ishq

wo hi be-chaargi-e-dil-zadagan hai ki nahin

kahiye nam hai ki nahin chashm-e-nadamat-asar

qafile walon ko ehsas-e-ziyan hai ki nahin

har gul-e-nam ke liye hai ki nahin gardish-e-chaak

ye jahan kargah-e-kuza-garan hai ki nahin

wo mera dushman-e-jaan hai ki nahin sang-ba-dast

raegan koshish-e-sad-shisha-garan hai ki nahin

'tishna' kuchh sab se juda hai ki nahin teri ghazal

munfarid 'sauda' ka andaz-e-bayan hai ki nahin