ab daur-e-asman hai na daur-e-hayat hai

ab daur-e-āsmāñ hai na daur-e-hayāt hai

ai dard-e-hijr tū hī batā kitnī raat hai

har kā.enāt se ye alag kā.enāt hai

hairat-sarā-e-ishq meñ din hai na raat hai

jiinā jo aa gayā to ajal bhī hayāt hai

aur yuuñ to umr-e-ḳhizr bhī kyā be-sabāt hai

kyuuñ intihā-e-hosh ko kahte haiñ be-ḳhudī

ḳhurshīd hī kī āḳhirī manzil to raat hai

hastī ko jis ne zalzala-sāmāñ banā diyā

vo dil qarār paa.e muqaddar kī baat hai

ye mushagāfiyāñ haiñ girāñ tab-e-ishq par

kis ko dimāġh-e-kāvish-e-zāt-o-sifāt hai

toḌā hai lā-makāñ kī hadoñ ko bhī ishq ne

zindān-e-aql terī to kyā kā.enāt hai

gardūñ sharār-e-barq-e-dil-e-be-qarār dekh

jin se ye terī tāroñ bharī raat raat hai

gum ho ke har jagah haiñ za-ḳhud raftagān-e-ishq

un kī bhī ahl-e-kashf-o-karāmāt zaat hai

hastī ba-juz fanā-e-musalsal ke kuchh nahīñ

phir kis liye ye fikr-e-qarār-o-sabāt hai

us jān-e-dostī kā ḳhulūs-e-nihāñ na pūchh

jis kā sitam bhī ġhairat-e-sad-iltifāt hai

yuuñ to hazār dard se rote haiñ bad-nasīb

tum dil dukhāo vaqt-e-musībat to baat hai

unvān ġhaflatoñ ke haiñ qurbat ho yā visāl

bas fursat-e-hayāt 'firāq' ek raat hai

ab daur-e-asman hai na daur-e-hayat hai

ai dard-e-hijr tu hi bata kitni raat hai

har kaenat se ye alag kaenat hai

hairat-sara-e-ishq mein din hai na raat hai

jina jo aa gaya to ajal bhi hayat hai

aur yun to umr-e-KHizr bhi kya be-sabaat hai

kyun intiha-e-hosh ko kahte hain be-KHudi

KHurshid hi ki aaKHiri manzil to raat hai

hasti ko jis ne zalzala-saman bana diya

wo dil qarar pae muqaddar ki baat hai

ye mushagafiyan hain giran tab-e-ishq par

kis ko dimagh-e-kawish-e-zat-o-sifat hai

toDa hai la-makan ki hadon ko bhi ishq ne

zindan-e-aql teri to kya kaenat hai

gardun sharar-e-barq-e-dil-e-be-qarar dekh

jin se ye teri taron bhari raat raat hai

gum ho ke har jagah hain za-KHud raftagan-e-ishq

un ki bhi ahl-e-kashf-o-karamat zat hai

hasti ba-juz fana-e-musalsal ke kuchh nahin

phir kis liye ye fikr-e-qarar-o-sabaat hai

us jaan-e-dosti ka KHulus-e-nihan na puchh

jis ka sitam bhi ghairat-e-sad-iltifat hai

yun to hazar dard se rote hain bad-nasib

tum dil dukhao waqt-e-musibat to baat hai

unwan ghaflaton ke hain qurbat ho ya visal

bas fursat-e-hayat 'firaq' ek raat hai