ab dil bhi dukhao to aziyyat nahin hoti

ab dil bhī dukhāo to aziyyat nahīñ hotī

hairat hai kisī baat pe hairat nahīñ hotī

ab dard bhī ik had se guzarne nahīñ paatā

ab hijr meñ vo pahlī sī vahshat nahīñ hotī

hotā hai to bas ek tire hijr kā shikva

varna to hameñ koī shikāyat nahīñ hotī

kar detā hai be-sāḳhta bāñhoñ ko kushāda

jab bach ke nikal jaane kī sūrat nahīñ hotī

dil ḳhush jo nahīñ rahtā to is kā bhī sabab hai

maujūd koī vaj.h-e-masarrat nahīñ hotī

yuuñ bar-sar-e-paikār huuñ maiñ ḳhud se musalsal

ab us se ulajhne kī bhī fursat nahīñ hotī

ab yuuñ bhī nahīñ hai ki vo achchhā nahīñ lagtā

yuuñ hai ki mulāqāt kī sūrat nahīñ hotī

ye hijr-e-musalsal kā vazīfa hai mirī jaañ

ik tark-e-sukūnat hī to hijrat nahīñ hotī

do chaar baras jitne bhī haiñ jabr hī sah leñ

is umr meñ ab ham se baġhāvat nahīñ hotī

ab dil bhi dukhao to aziyyat nahin hoti

hairat hai kisi baat pe hairat nahin hoti

ab dard bhi ek had se guzarne nahin pata

ab hijr mein wo pahli si wahshat nahin hoti

hota hai to bas ek tere hijr ka shikwa

warna to hamein koi shikayat nahin hoti

kar deta hai be-saKHta banhon ko kushada

jab bach ke nikal jaane ki surat nahin hoti

dil KHush jo nahin rahta to is ka bhi sabab hai

maujud koi wajh-e-masarrat nahin hoti

yun bar-sar-e-paikar hun main KHud se musalsal

ab us se ulajhne ki bhi fursat nahin hoti

ab yun bhi nahin hai ki wo achchha nahin lagta

yun hai ki mulaqat ki surat nahin hoti

ye hijr-e-musalsal ka wazifa hai meri jaan

ek tark-e-sukunat hi to hijrat nahin hoti

do chaar baras jitne bhi hain jabr hi sah len

is umr mein ab hum se baghawat nahin hoti