ab dil mein tere tir ka paikan nahin raha

ab dil meñ tere tiir kā paikāñ nahīñ rahā

kyūñkar jiyūñ ki ziist kā sāmāñ nahīñ rahā

gardūñ kī samt dekh ke ruḳhsat huā marīz

jab koī us ke haal kā pursāñ nahīñ rahā

tāroñ ne kar diyā tirī vahshat kā raaz faash

ai raat terā husn bhī pinhāñ nahīñ rahā

mujh par to terī aañkh ne phir kar ġhazab kiyā

maiñ lutf-gīr-e-gardish-e-daurāñ nahīñ rahā

fasl-e-bahār kī mirī vahshat ne dī ḳhabar

ab dil sambhālnā mujhe āsāñ nahīñ rahā

ai yaas tū ne aa ke sahārā diyā mujhe

jab koī mere haal kā pursāñ nahīñ rahā

pichhle pahar shikast kī āvāz aa.ī hai

TuuTā hai dil ki zabt kā imkāñ nahīñ rahā

ab dil meñ tere tiir ke paikāñ kī yaad hai

go dil meñ tere tiir kā paikāñ nahīñ rahā

hañste haiñ phuul zaḳhm pe dushman hai bāġhbāñ

gulshan meñ jī bahalne kā sāmāñ nahīñ rahā

jo dard tū ne jis ko diyā vaah re asar

us dard kā jahān meñ darmāñ nahīñ rahā

vahshat bharī nigāh ne vīrān kar diyā

ab kyā karūñ vo rañg-e-gulistāñ nahīñ rahā

hasrat ne be-kasī meñ kafan ban ke Dhak liyā

ab lāsha mujh ġharīb kā uryāñ nahīñ rahā

'afsar' mushā.eron meñ hai kyoñ merī justujū

maiñ to mushā.eron meñ ġhazal-ḳhvāñ nahīñ rahā

ab dil mein tere tir ka paikan nahin raha

kyunkar jiyun ki zist ka saman nahin raha

gardun ki samt dekh ke ruKHsat hua mariz

jab koi us ke haal ka pursan nahin raha

taron ne kar diya teri wahshat ka raaz fash

ai raat tera husn bhi pinhan nahin raha

mujh par to teri aankh ne phir kar ghazab kiya

main lutf-gir-e-gardish-e-dauran nahin raha

fasl-e-bahaar ki meri wahshat ne di KHabar

ab dil sambhaalna mujhe aasan nahin raha

ai yas tu ne aa ke sahaara diya mujhe

jab koi mere haal ka pursan nahin raha

pichhle pahar shikast ki aawaz aai hai

TuTa hai dil ki zabt ka imkan nahin raha

ab dil mein tere tir ke paikan ki yaad hai

go dil mein tere tir ka paikan nahin raha

hanste hain phul zaKHm pe dushman hai baghban

gulshan mein ji bahalne ka saman nahin raha

jo dard tu ne jis ko diya wah re asar

us dard ka jahan mein darman nahin raha

wahshat bhari nigah ne viran kar diya

ab kya karun wo rang-e-gulistan nahin raha

hasrat ne be-kasi mein kafan ban ke Dhak liya

ab lasha mujh gharib ka uryan nahin raha

'afsar' mushaeron mein hai kyon meri justuju

main to mushaeron mein ghazal-KHwan nahin raha