ab dil mein wo ranai-e-ehsas nahin hai

ab dil meñ vo rā'nā.ī-e-ehsās nahīñ hai

kis phuul meñ varna tirī bū-bās nahīñ hai

barbād-e-mohabbat kī ye āsūda-mizājī

ab gardish-e-daurāñ kā bhī ehsās nahīñ hai

kāñToñ pe guzārī hai sar-e-bazm-e-gulistāñ

ġhunchoñ ko tabassum kī adā raas nahīñ hai

baḳhshe haiñ tirī chashm-e-'ināyat ne vo nashtar

is dil ko taḌapne kā bhī ehsās nahīñ hai

majbūrī-e-fitrat hai mire lab kā tabassum

mere dil-e-majrūh kā akkās nahīñ hai

ġhunchoñ meñ kahāñ tere tabassum kī adā.eñ

phūloñ meñ tirī nik.hat-e-anfās nahīñ hai

duniyā-e-ḳhalish ne’mat-e-ġham yaas kā 'ālam

hai kaunsī daulat jo mire paas nahīñ hai

aa jā.iye ab aap mirī ḳhalvat-e-ġham meñ

is vaqt mirā dil bhī mire paas nahīñ hai

har 'aks meñ aa jaa.e nazar 'badr' vo lekin

raushan abhī ā.īna-e-ehsās nahīñ hai

ab dil mein wo ra'nai-e-ehsas nahin hai

kis phul mein warna teri bu-bas nahin hai

barbaad-e-mohabbat ki ye aasuda-mizaji

ab gardish-e-dauran ka bhi ehsas nahin hai

kanTon pe guzari hai sar-e-bazm-e-gulistan

ghunchon ko tabassum ki ada ras nahin hai

baKHshe hain teri chashm-e-'inayat ne wo nashtar

is dil ko taDapne ka bhi ehsas nahin hai

majburi-e-fitrat hai mere lab ka tabassum

mere dil-e-majruh ka akkas nahin hai

ghunchon mein kahan tere tabassum ki adaen

phulon mein teri nikhat-e-anfas nahin hai

duniya-e-KHalish ne’mat-e-gham yas ka 'alam

hai kaunsi daulat jo mere pas nahin hai

aa jaiye ab aap meri KHalwat-e-gham mein

is waqt mera dil bhi mere pas nahin hai

har 'aks mein aa jae nazar 'badr' wo lekin

raushan abhi aaina-e-ehsas nahin hai