اب دلائے مجھے تسکین تو آخر کوئی

اب دلائے مجھے تسکین تو آخر کوئی

دے گیا درد کا احساس مہاجر کوئی

میری فریاد و فغاں گونج رہی تھی لیکن

میرے گھر تک نہیں آیا کبھی ناصر کوئی

رنگ اڑتا ہوا لگتا ہے ہر اک تتلی کا

آ گیا باغ میں کیا پھول کا تاجر کوئی

اپنے دامن میں لئے جاتا ہے رستے کا غبار

چھانو ہے ہی کہاں ٹھہرے جو مسافر کوئی

ہر گھڑی رکھی ہے گردن پہ سیاسی تلوار

کیسے زندہ رہے اخبار کا ناشر کوئی

بے رخی اتنی بھی اچھی نہیں ہوتی آتشؔ

کب سے ہے پیار کا تحفہ لئے حاضر کوئی