ab dilae mujhe taskin to aaKHir koi

ab dilā.e mujhe taskīn to āḳhir koī

de gayā dard kā ehsās muhājir koī

merī fariyād-o-fuġhāñ guuñj rahī thī lekin

mere ghar tak nahīñ aayā kabhī nāsir koī

rang uḌtā huā lagtā hai har ik titlī kā

aa gayā baaġh meñ kyā phuul kā tājir koī

apne dāman meñ liye jaatā hai raste kā ġhubār

chhāñv hai hī kahāñ Thahre jo musāfir koī

har ghaḌī rakkhī hai gardan pe siyāsī talvār

kaise zinda rahe aḳhbār kā nāshir koī

be-ruḳhī itnī bhī achchhī nahīñ hotī 'ātish'

kab se hai pyaar kā tohfa liye hāzir koī

ab dilae mujhe taskin to aaKHir koi

de gaya dard ka ehsas muhajir koi

meri fariyaad-o-fughan gunj rahi thi lekin

mere ghar tak nahin aaya kabhi nasir koi

rang uDta hua lagta hai har ek titli ka

aa gaya bagh mein kya phul ka tajir koi

apne daman mein liye jata hai raste ka ghubar

chhanw hai hi kahan Thahre jo musafir koi

har ghaDi rakkhi hai gardan pe siyasi talwar

kaise zinda rahe aKHbar ka nashir koi

be-ruKHi itni bhi achchhi nahin hoti 'atish'

kab se hai pyar ka tohfa liye hazir koi