اب دعاؤں سے بھی بہتر نہیں ہونے والا

اب دعاؤں سے بھی بہتر نہیں ہونے والا

سوچتے وہ ہیں جو اکثر نہیں ہونے والا

شہر کا شہر ہے اب اس کی طلب میں غلطاں

جو کسی کو بھی میسر نہیں ہونے والا

خود کو بدلیں گے تو حالات بدل سکتے ہیں

ورنہ تبدیل یہ منظر نہیں ہونے والا

پھر نئے ڈھنگ سے تخلیق ہو اس دنیا کی

حادثہ ایسا مکرر نہیں ہونے والا

رنج ہی رنج ہیں درپیش مجھے شام و سحر

پھر بھی میں رنج کا خوگر نہیں ہونے والا

آسماں زادوں سے حق چھین کے لینا ہو گا

حال اب اس سے تو بد تر نہیں ہونے والا

میری سانسوں میں ندیمؔ ایسے سمایا ہوا ہے

وہ جو اک شخص مقدر نہیں ہونے والا