ab dua ka zor chalta hi nahin

ab duā kā zor chaltā hī nahīñ

hijr kā aaseb Taltā hī nahīñ

laakh bahlā.eñ bahaltā hī nahīñ

dil kisī karvaT sañbhaltā hī nahīñ

sar pe sūraj hai khaḌā muddat huī

din ye kaisā hai ki Dhaltā hī nahīñ

āzmā.ī to hai us ne har adā

husn kā ab sehr chaltā hī nahīñ

zindagī laa.ī hai ab kis moḌ par

ab qadam koī sañbhaltā hī nahīñ

har ghaḌī ehsās kā tūfān hai

dil kā ye aalam badaltā hī nahīñ

ḳhuun jab tak ro na le chashm-e-ufuq

sub.h-dam sūraj nikaltā hī nahīñ

vaqt hī ke mātahat sab kaam haiñ

vo jo kah de phir vo Taltā hī nahīñ

shahr-e-dil tārīk hai 'shāriq' bahut

diip armānoñ kā jaltā hī nahīñ

ab dua ka zor chalta hi nahin

hijr ka aaseb Talta hi nahin

lakh bahlaen bahalta hi nahin

dil kisi karwaT sanbhalta hi nahin

sar pe suraj hai khaDa muddat hui

din ye kaisa hai ki Dhalta hi nahin

aazmai to hai us ne har ada

husn ka ab sehr chalta hi nahin

zindagi lai hai ab kis moD par

ab qadam koi sanbhalta hi nahin

har ghaDi ehsas ka tufan hai

dil ka ye aalam badalta hi nahin

KHun jab tak ro na le chashm-e-ufuq

subh-dam suraj nikalta hi nahin

waqt hi ke matahat sab kaam hain

wo jo kah de phir wo Talta hi nahin

shahr-e-dil tarik hai 'shaariq' bahut

dip armanon ka jalta hi nahin