اب دعا کا زور چلتا ہی نہیں

اب دعا کا زور چلتا ہی نہیں

ہجر کا آسیب ٹلتا ہی نہیں

لاکھ بہلائیں بہلتا ہی نہیں

دل کسی کروٹ سنبھلتا ہی نہیں

سر پہ سورج ہے کھڑا مدت ہوئی

دن یہ کیسا ہے کہ ڈھلتا ہی نہیں

آزمائی تو ہے اس نے ہر ادا

حسن کا اب سحر چلتا ہی نہیں

زندگی لائی ہے اب کس موڑ پر

اب قدم کوئی سنبھلتا ہی نہیں

ہر گھڑی احساس کا طوفان ہے

دل کا یہ عالم بدلتا ہی نہیں

خون جب تک رو نہ لے چشم افق

صبح دم سورج نکلتا ہی نہیں

وقت ہی کے ماتحت سب کام ہیں

وہ جو کہہ دے پھر وہ ٹلتا ہی نہیں

شہر دل تاریک ہے شارقؔ بہت

دیپ ارمانوں کا جلتا ہی نہیں